DAN ZAWH RUAL LOH

DAN ZAWH RUAL LOH

Kan veng chu kan tlem em em a, Aizawla Veng te ber pawl kan ni ngei ang. Chuvang pawh chuan mihring kan tlem in a mihringa te pawh chu kan in hre kim deuh vek a, keini, lo awm rei deuh tawh tan phei chuan lo awm thar emaw, naute piang thar te chu kan hre zung zung thin. Chutianga lo awm thar zingah chuan kan kawmchhaka chhungkaw lo awm tharte chu keini chuan kan han tlawhpawh hmasa ber hial a, hmeithai an ni a, unau, hmeichhia hlir pathum an ni a, an fanu upa ber phei chu nula hmeltha tak a ni nghe nghe.

An rawn awm tirh atang chuan kohhran an bel nghal chat a, an unau chuan an inkhawm thap thap a, mitthi inah nise an tlaivar thap thap a, lehkhathiam rual tak an nih bawk si avang chuan vengchhung mi te pawh chuan rei lo te ah kan hre nghal thuai a, sawiselna tur reng reng kan hre hauh lo.

Kohhran thalai hruaitu ka nihna ang in an unau chu biak that an ngai tih ka hria a, a chhan pawh zaipawl ah an tha dawn hle in ka hria a, hmeichhia kan nei chau in pathum ngawt an rawn inhman thap thap chuan kan phuisui phah dawn em a ni.

Tuk khat chu ka nau, kan inhnuaia pasal neia indangta chu zing kar ka thawh hlim chuan kan inah a fanu pawm chung chuan a lo thu a. Ka va tho chhuak chu en pawh min en lem hlei lo hian a lo ang bawrh bawrh a. Ka nu chuan eirawng a bawl a, a fanu pawm chung chuan chair ah a thu a,

“Nizan ah pawh a leng tih ka hria, Chhuanlam fahrah te te siam in a chhuak reng a, ka ngaih hi a tha tawh thlawt lo. Khi mi te rawn awm hma kha chuan hetiang hian a khawsa ngai lo.” Tiin ka nu bai chuang chu a lo hrilh a.

“A tu ber nen khian maw I rinhlelh?” tiin ka nu chuan a lo zawt a,

“Remi khi”.

“Chu chu a tu ber khi nge?”
“An upa ber khi mawle”

“I ringhlel vel mai mai a niang, chutiang ti duh hmel pawh a put loh khi” tiin ka nu chuan a han ti a.

“Rinhlelh turin an awm tlat si a lawm, kan pa mitmeng te zawng ka hrechiang lutuk, a ngaihmelh mitmeng te zawng ka hai lo reng reng. Chuan, Remi pawh khian a haw miah lo tih ka hre bawk” a han ti leh a.

“Kawmthlangte tiin a be tha satliah ve mai mai a ni ang, manna fak I neih loh chuan in pa emaw, Remi emaw chu dawp miah suh, in inkar a tichhe vek mai ang” tiin ka nu chuan thurawn a han pe a.

“Ngati nge Remi chu?” tiin ka va inrawlh thuai a.

“Ka zu chhuk phawt a nge, naupang sikul an kal hma si a” tiin ka nau chuan a ti a, a chhuk ta a.

“Enge a awmzia?” tiin ka nu chu ka han zawt leh a,

“Hmeichhe thu hla mai mai mai, inhriat ve vek pawh a ngai lo ve” a ti liam mai a, chutianga ti ta na na na chu, tiin ka ngaihtuah chhunzawm lem ta lo va.

Krismas lenkhawm lai a ni a, lengkhawm ka haw chu inhau thawm ka hria a, ka han ngaithla chiang a, inhnuaia ka nau leh a pasal chu an lo ni a, an aw rawl a rin em avang chuan ka zuk chhuk thla a.

“Ngati ta chiam chiam nge, in bengchheng lutuk, veng mipui te pawh an zahawm a lawm” tiin kawngka hawn rual chuan ka zuk ti lut nghal a.

“He pa hi lawm, lenkhawmnnah ka kal dawn tiin a chhuak a, I hmu em? Lenkhawm naah a lo kal em?” tiin ka nau chuan pawr fe hian min rawn zawt a.

Ka han mitthla zuaih zuaih a, ka hmu ngei a, mahse reilo te hnu ah a chhuak tih pawh ka hria.

“Hmuh te chu hmu e, mahse” ka han ti dek dek a,

“Enge mahse chu, enge mahse chu?” tiin ka nau chuan a ti nghal tawn tawn a.

“In bengdai teh, khatin rak vak vak suh” tiin ka lo zilh a,

“Lenkhawmnaah chuan a rawn kal ngei a, mahse ban hma in a chhuak” tiin ka han sawi a, kan makpa ngei pawh chu awm mahse thudik chu thudik tiin dawt sawi chu ka tum lem lo.

“Chu I haw hma reng chu, Remi te in atanga I rawn chhuak lai pawh thenawm nu Zasiami’n a hmu ngei che lawm.” Tiin an pa chu a chhuahchhal nghal pang pang a.

“Lenkhawm naah an unau tumah an rawn lang si lo va, tiin ka va lut kawi zawk a nih kha” tiin kan makpa chu a tang ve thung a.

“Khi inah khian I luh kawi dawk dawk a ngai lo. I ngaizawngte a nih loh chuan” tiin ka nau chu a thinrim khawp a.

“Lo lut kawi pawh nise enge ni chuang? A ngaizawng tihna pawh a nichuang hleinem, mu rawh u, naupang ho pawh an mangang lutuk ang” tiin thulai lak chu ka han tum hram hram a. Ka inrawlhna tur pawh a ni chiah in ka hre tawh lo va, ka chho leh ta a.

Ka mut hmunah chuan ka inngaihtuah a, Remi chu nula hmeltha tak chu a ni a, mahse mi pasal han ngaizawng tur chi khawpa ler a nih chu ka ring chiah lo. Ngaihzawng a nei chuang pawh in ka hre hek lo. Kohhranah pawh inhmang tha tak, inchei uchuak ngai silo, lehkhathiam si, zahawm tak a ni a, kan makpa nen chuan boruak an neih pawh chu ka ring pha chiah lo.

Mahse mi te chuan ka bulah an sawi lo mai mai a lo ni. Kan kohhrana nula ka kawm ve thin te ho zinga ka rin ber Rinpuii chu WhatsApp in ka va zawt ta ringawt a.

“A, chutiang vak pawh a nilo” tiin min rawng chhang ta ngei a, thil a awm tih chu ka ring thiam ta a.

“Han sawi vek teh” tiin ka va message leh hram a.

“He ta sawi vak chi pawh a ni lo. Lo phei la, ka la mu chuang lo va, thingpui in pah in kan sawi dawn nia” a rawn ti a.

Peih lo viau mah ila thudik hriat ngei chu ka duh si avang chuan a zan a zan chuan ka va phei a, in leng neuh neuh chu an lo la nei a, mahse min ko hrang a, an choka ah chuan thingpui lum pahin min hrilh ta a.

“Kei pawn ka ringhlel deuh thin a, mahse ka ring ngam bik chiah lo va, mahse ka mit ngei in an inzui lai ka hmuh hnu kha chuan ka ring ve ta deuh a” a han ti phawt a.

“Ngati nge min hrilh vat loh?” tiin ka lo ti thuai a.

“Aw, in makpa  a ni a, sawi a nuam lo a lawm”

“Khawiah nge an inzui chu I hmuh reng reng?”

“Sikulpuikawnah. A rei leh tawh, September thla vel kha niin ka hria. In makpa leh Remi chu an rawn inphur a, mak ka ti rilru khawp a, va biak chu ka duh na in eng vanga inzui ngawt nge an nih tih chuan min buk rit zawk a, tichuan reilo te chu ka zui ru a lawm. Dawrah an lut a, thil an lei a, inthenawm an ni si a, an haw rual pah dawn niang ka ti rilru a, kalsan mai ka tum lai tak chuan in makpa chuan Remi chu a kuah a, phawk fe in ka en a, min hmuh hlau in ka biru a, ka haw san ta a. Khata tang khan an pahnih hian ka hmu duh leh zauh thin. Kha, krismas fatu ah pawh an pahnih kher in purun an chan kha, I hmu ve em?”

“Hmu ve tho e, mahse chutiang thil a awm chu ka lo ring pha ngailo hrim hrim”

“Hmeichhia te hian thil chu kan lo chik deuh zawk a nih hi” a ti a, a thingpui lum chu min rawn pe a.

“Mi dangte hian an hre hnem tawh em?” tiin ka han zawt leh a,

“An hre deuh vek tawh zawk ang. Remi a hmeltha in a lar reuh si a, nula ho sawi nuam tih chi a nia, kan nau nula te pawn an sawi nasa thin khawp a, ka han khap ve bawk tak na a, chanchinchhe lam a ni si a, an insum zo hlawm lo” a ti leh mai a.

“Engtia han tihchi nge maw ni dawn le?” ka han ti leh ringawt a, ka mangang ve takzet tawh a, ka zak bawk si.

“Ka hrethiam bik lo. Pawh then thuai chu thil tha ber a ni ang. Mi sawi ka hriat dan phei chuan, Remi khian an awmna hmasa ah mi pa tho a ngaizawng a, sex pawh an hmang a ni awm e, chung vel vang chuan an zak a, an in an hralh a, khitah khian inhmun an rawn lei ta e an tia lawm. Tak tak nge dawt phei chu ka hre bik hauh lo va, mahse an veng hluia ka thiante ka zawh pawh in chutiang deuh chiah chiah chuan an sawi tlat a ni” a ti a. Thingpui no vel chu a khawm a, a va sil nghal sawk sawk a.

In a ka haw leh chuan ka chungte chu an lo reh thap tawh a, ka khumah mut ka han tum chu ka nau te nufa chu an lo mu deuh dal a, “Thuthlengah riak mai rawh” tiin thawm dim deuhin a rawn ti sa sa a, rizai ka phawrh belh a, ka va mu ve mai bawk a.

Ka nau rilru lian leh thin butut nei chu titau in kan inah a rawn tlan tih chu a hriat mai a, thil thlen dan chu a tha lo tawlh tawlh a,  kan makpa pawh chuan ka thin a ti rim in chu ai nasa mah chuan Remi pawh chu ka hua a, kan mengrei ngun in thalai kan hah em a, mutchhuak chuan min rawn zial miai miai a, tui tak chuan ka muhil ta thuai a.

A tuk zinga chuan inhau thawm bawk in min ti harh a, choka lamah chuan ka pa chuan thinrim fe in ka nau chu a lo hau a.

“Enge I han tih reng reng a, I zak miah lo em ni? Khatianga mi zawng zawng mit hmuhah in tihmualpho kher kha a tul em ni?” tiin ka nau chu a kawk sawk sawk a.

“Kan pa min chuhpui a, fa pawh pathum kan nei tawh a, chu chu min rawn chuh pui a, a ngaizawng ngam a, ka dawhthei zawk ngawt a lawm. Khawtlang hmuhah pawh a zui ngam a, chuan kei in vawi khat hmaichhanah ka han ankhum a, ka zakthei lo zawk a maw?” a lo ti ve thung a.

“Chutia in pa in ngaihzawng dang a neih te chuan tan la a I pasal chu duat zual sauh tur I ni a sin. A ngaizawng tih hre mah la I hrelo der anga, ngaihzawng dang a mamawh lo tih I awm dan in I lantir zawk tur a lawm, nangmah I intimual pho a, kan chhungkua iti mualpho a, I pasal I timualpho bawk tih hria ang che. Tunah zuk chhuk vat la, I pasal hnenah ngaihdam zuk dil rawh” tiin ka pa chuan a ti a.

“Teuh lo mai, a teuh hnaisai lo.”

“Nangmah chiah I inti mualpho tih hria ang che” tiin ka pa chuan a chhuahsan ta a.

Mahse ka pa chu a dik chiah lo, mi zawng zawng chuan ka nau chu an khawngaih a, Remi chu an hua a, khata tang khan an unau chu an rawn inkhawm ta ngai lo va, tumah an tlawh pawh lo va, khawlaia han hmuh changte pawh hian an hlim lo tih chu a hriat ngawih ngawih a, kan makpa nen pawh chuan an inzui chhunzawm tawh lo.

Chutiang a nih avang chuan buaina chu a reh mai turah ka lo ngai a, mahse a teuh lo. Remi te ai daih chuan ka naute nupa chu an hlim lo va, an inhau reng a, an fate pawh chu ka nu chuan a awm sak chawt chu a ni mai a, a tu a mah chu kan hlim lo a ni e.

Thlakhat a liam a, Remi te chuan an in chu mi luah tir in an ni chu veng dangah an insawn a, chutah chiah chuan ka nau chu a pawr kher mai. Kan venga a thian te zawng zawng hnenah a leng kual a, Remi te chanchin chu sawi nuam a ti in a tlangau pui ni a ni ta ngawt a, mahse, an nupa pawh chu an inthen ta thuai a, an pa chu chhuak in an inpui lamah a awm ta daih a.

 Khata tang chiah khan niin ka hria ka nau khan zu a in tan ni. Nula hmeltha tak niin pasal hmeltha tak a nei a, mahse tunah chuan mahni fate pawh hmangaih zo tawh lovin a ruih bo san a, ka nu lah chu a thin hi a rim em em a, engkim chu Remi te vangah a puh vek a, ka nau rui thle mai mai pawh chu hau lovin a khawngaih tlat a, a enliam vel mai mai a ni. Thla li a liam leh meuh chuan ka nau chu accident in a boral a, an sawi dan chuan a rui lutuk Bike atang a tla a, a hnunga truck lo tlan in a chil zui ta a ni awm e.

Krismas a lo thleng a, kan chhungkua chu kan ngui em em a, ka nau fate chu kan inah an awm a, an la naupang in a lian ber pawh sikul a kal tan ek ek chauh a ni si a, ka nu chu a hah zual phah em em a, chumi tum pawh chuan naupang ho chu krismas bazaar pui turin min ti a, naupang ho chuan an lo chak bawk nen ka chhuah pui a.

Bazar ah mi an tam em avang in bazaar pui ka helpui hram hram a, zarkawt phei a kan kal mek lai chuan Remi chu ka hmu hlawl a, ani pawh chuan min rawn hmu a, ka naupang hruaite chu a han hmu leh a, a kimki deuh chawih chawih a, chak deuh mai chuan a kal sawn a, mahse ka va um thuai a, ti ti pui ka duh vang pawh a ni.

Dawrah chuan thil kan ei a, naupang ho chu an ninhlei in an che sek a, Remi erawh chu ngawi rengin a thu a, leilam chu a en tlat a.

“A pawi ka ti lutuk, ka inveng ve viau a sin, mahse Tluanga kha chu ka hnar thei thlawt lo a ni” a ti ta hlawl a.

A mittui chu a hru zauh a, “Kan vengah khan hmangaih deuh mai chu ka nei ngei a lawm. Kan tleirawl chhuah atang in kan ingaizawng tawh a, mahse zankhat chu kan inhau a, a tuk lawkah nupui a ruk thu ka hre ta a, hreawm ka ti lutuk chu ka nu chuan min khawngaih a, kan in, ka pa sak ngei chu kan hralh a, in vengah khan kan rawn pem ta a. Kan rawn insawn luh ni khan ka ngaihzawng hlui ang deuh mai ka hmu a, amah emaw tiin ka han enchiang a, mahse a lo ni lo. Ka hmuh tirh atang khan a lakah khan ka tuiral a ni ber. Chumi zan pawh chuan chutia ka mipa duh zawng tak ka hmu ta chu ka hlim rilru em em a, ka rilru la peng thei khawpa ka duh ka hmu khan min ti lawm a ni. Mahse ka hriat zui dan chuan pawmlai nei a ni a, fa pawh pathum lai a nei tawh tih ka hria a, thil tih chi loh tawp a ni tih ka hriat avang chuan ngaihtuah zui loh pawh ka tum hle a, mahse amah khan min rawn hnaih tlat a, min rawn be hmasa a, a rawn leng a, min chhaih a, dik tak chuan ka inveng ve nasa a sin. Ka theihtawp chu ka chhuah ve a, ka hnar a, mahse ka thei ta ngang lo a ni. A tirah chuan ka fimkhur em em a, ka unau te pawhin min hau nasa. Ka inveng ve hle emaw ka tih lai chuan ka hmangaih zia chu ka hrechiang tulh tulh a, ani lah chuan min rawn hnaih tulh tulh bawk si, khatia chanchin deuh kan neih hnu kha chuan theihtawp in then tumin ka bei a, tawngtaina nen amah hlat tum in ka bei a, amah vangin krismas pawh biak in lamah ka hman loh phah ta reng a. Ka la hre reng, thu tawp sawi pui tum in a lengkhawm ka ko haw a, a rawn leng a, inthen ka duh thu chu ka hrilh ta a. Ka hmaah thingthi meuh in min ngen a, mahse thil dik lo a ni tiin ka thinlungin a duh em em chu ka ka chuan ka hnar ta a. A haw hnu kha chuan ka thaw huai a, mahse  atukah I nau khan min rawn luhkhung a, min rawn kek a, min an khum ta chiam chiam a, ka zak lutuk chu ka nu hnenah pem leh mai chu ka ngen a. Mahse ani chuan tuar chhuak tur chuan min ti tlat a, tuarchhuah theih ngei pawh ka tum. Mahse keini lo awm thar ta chu hmelhriat kan nei tlem si a, I nau khan kan chanchin kha a chhe zawngin a sawi kual ta chiam mai nen, ka nu thleng thleng khan an hmuh dan kha a dik tawh bik si lo a, kan pem leh phah ta a ni. In chhungkua ka tihbuai naah cheu khan ka inthiam lo tak zet a, inngaihdamna ka mamawh tak zet a ni” a ti ta a.

Kan thil chah te chu a rawn thleng a, kan ei ho a, boruak rit deuh chung chuan kan inthen ta a.

In a ka haw chu ka nu chu thuthlengah a lo tlu zal a, kan lut chiah chu. “Nupui hi nei ve la a tha ang. Rinpuii saw I duh mai lawm ni?” tiin nui deuh chung hian a rawn ti a, “A, ani zawng, a tawng thei em mai” ka ti a, ka tu te ho in an thil thar an pawrh sap sap lai chuan Remi ringawt chu ka rilruah a cham reng a.