RUANG KHAWHAR.

RUANG KHAWHAR.

Ka bula mu ka u chu a muhil tawh a, kan piahah chuan U mama fate ho chu a nupui U Thlamuani hovin mu bawk a. Ka muhil thei lo va, tlaiah khan ka inbual lo va, ka bal nasa mai si, ka thak sep sep a, ka muhil thei lo a ni.

Ka nu pawh a muhil bik lo tih a thaw atang chuan ka hria a, a chhan chu ka pa chu Vai Sipai hoin an ko leh tlat a, engtin nge an lo tih ang tih chu ka hrethiam chiah lo na a, thil lawmawm tak a ni chuan ka hre bik hauh lo.

Kan kawngka chu a rawn ri rak rak a, ka nu chu a tho nghal thuai a, kan bang awng atang chuan ka bih ve nghal thuai bawk a. Ka nu in kawngka a han hawng chiah chu ka pa chu a rawn tlu lut tawp mai a. Ka phu deuh zawk a. A hmai leh a taksate chu thisen in a khat vek a, ka nu chu a au deuh tuarh a. Ka u chu ka kheuh a, tho phang lek lek hian, “Eng nge ni?” a rawn ti a, “A pa a thi dawn niang, i tho ang” ka ti ta ringawt a. Ka u nen chuan hmanhmawh fe in kan tho chhuak a, ka u chu hmeichhia tih takah a tap chu a ni deuh nghal mai a. Ka nu chuan kei chu min rawn kawk a, “Va mu rawh” a rawn vin deuh tuarh a, hnial ngam ni hek lo le, rilru khingbai deuh chuan ka va mu leh a, mahse kan bang awng atang chuan ka bih thla kar thung a.

Ka nu leh ka u chuan ka pa chu an silfai a, kan thuthlengah chuan an mut tir a, ka nu chuan an khum hnuaia a lapaw dah chu a rawn phawrh sat sat a, ka pa hnar leh a lu kakah te chu a va hru fai a.

Ngati nge vai sipai ho hi an sual em em le? Anmahni vangin luiah pawh kan kal thei tawh lo va, kan inkhawm thei tawh lo va, sikul kal ve ka chak tawh tehreng nen, kan zirtirtupa ber a bo daih bawk si a. Ka U mama lah chu a bo daih bawk a. Thil awmdan chu engmah ka hrechiang ve chuang lo na a, kan awm dan chu thil hreawm tak a ni tih chu ka hrethiam vek tho.

Ka nu tawng ri chu ka hre viai viai a, “Eng vanga Mama awmna chu i hre turah an ngaih tlat mai le? Keini pawhin kal lo se chu kan ti ve tho a sin, a va han mangan thlak tak em”  a ti a, keini naupang ho hriat chu a hlau deuh a ni ang, a rawl a rin thin tehreng nen, zawi sap chuan a tawng a.

“An zinga an chhuanvawr leh an sipai lal thattu kha a ni tlat si a, an tan chuan an tum ber tur kha  a a ni tlat si a lawm. Kan hun tawn hi zawng a hahthlak teh a nih hi.”

“Hriati, thing kha ren rawh. Kumin kan tla lo a ange, thing phur tura chhuah a harsa ropui si” tiin ka u hmanhmawh lutuk in thing a lo tuah belh chu ka nu chuan a va hau a.

“Lum vat vat se ka tia lawm mawle” tiin ka u chuan bak deuh hlar hian a lo chhang a.

A tukah chuan ka pa chu a ngawichawi kher mai. Chaw kan ei laite chuan naupang ho chu kan ri leh deuh nak nak a, mahse ka pa chuan min hau lo reng reng. Ka naute ho, ka u mama fate ho chu pathum lai an ni a, a upa ber chu kei ai a naupang zawk a, kan inkawm tawk em em a,  a dang pahnihte chu phir niin hmeichhia ve ve an ni a, an la naupan em avang chuan keini chuan kan kawm ve meuh lo.

Ka nau Ringa chuan antam tui chu a hawp a, ka pa chuan engtin mah a ti lo va, ka hawp ve chak em em a, ka hawp ve a, ka nu chuan min rawn hau ta tho a.

Chumi ni pawh chuan eng mah kan ti leh lo va. Kan awm mai mai a. A tirah kha chuan a nuam kan ti viau thin. Mahse tunah chuan a ninawm lek lek tawh a ni. Khua chu a reh ruih a, ka sikul kal ve na tur tlanga mi ah chuan sipai ho chu an inkhuar tlat si, sikul huana theihai rah tur pawh chu kan lo ngam tawh dawn lo hrim hrim, a bul hnaiah pawh kan kal ngam tawh lo. Kan tukverah chuan ka dak a, khua chu a reh tlawk tlawk a, ar khuang ri hriat tur a awm leh zauh zauh a, khawlaia mihring kal tak ngial pawh hmuh tur a awm lo.

Ka pa chu nilengin a mu a, a  lu chu ka nu chuan a tuam sak bur a, a awmchilh deuh chawt a, keini naupang ho chu U Hriati leh U Thlamuani te chuan min awm a, naupang na na na chu kan han infiam a, kan hlim leh hle tho a.

Zan a lo ni a, Sipai ho chuan ka pa chu an rawn hruai leh angem aw tiin ka inngaihtuah ve nasa mai a, ka mangang chuan ka nu chu ka va zawt ta tawp mai a. Ani chuan an rawn hruai dawn tawh loh thu chu min lo hrilh a, ka thlamuang nghal em em ringawt a.

Zan kan mu chu ka inbual tawh vang a ni ang, ka mutui em em a, mahse zawite tea inbe thawm ka hria a, chu chuan min ti harh a, bang awng atanga ka va bih nak chuan ka u Mama chu ka pa nen an lo inbia a, ka U mama chuan sipai kawr ang deuh hi a ha a, a sam chu a buk em em a, a bulah chuan silai a tung ran bawk a. Ka hmuh chiah chuan ka u pawh ni mahse ka ngaisang em em a, a silaite chu ka khawih chhin chak khawp mai a, thawh tumin ka insiam rem mek tihah chuan vai sipai au ri ka hre ta thut a. Kan in bul lawkah an awm niin ka hria a, ka hlau lutuk chu kan khum hnuaiah ka bawk  lut nghal rawk rawk mai a.

Kan choka lamah chuan hmanhmawh deuha tlanchhe thawm ka hre nghal a, reilo te hnuah chuan silai puak nghal thuai thuai a. Ni dangah pawh ka hre fo, mahse tun tum a mi chu ka rap lek lek. A hnai si, a ring si, ka nau Ringa chu ka awmna khum hnuaiah chuan a rawn tlan lut ve a, kan nau phir naupangte chu an tap a, ka nu mangang chu a au deuh ruai a, a tawngtai a, U Hriati erawh chu che sawn lo hian bang kil lamah chuan a beng hup in a thu tawm chawih chawih a, U Thlamuani lah chu khumah chuan a fate chu a kuah khawm a, an tah nasat em avang chuan ani pawh chuan tah aw tuau hian a thlem a.

Silai chu a puak thuai thuai a, ka hlauh ang ngei in na tuar thawm in a zui nghal a, tunge aw niang ka ti rilru a, ka u ni lo hram se, tiin hlauhthawnna chuan min man a, ka mittui chu a rawn tla a.

Ring takin vai pakhat a rawn au a, kan huan chu a ri nghal sung sung a, silai puak pawh chu a reh chhunzawm nghal a. Mahse buaina chu a la rawn intan dawn chauh.

Kan kawngka chu na takin an rawn tlawh hawng a, vai tawng, vin em em hian a rawn au tuarh tuarh a. Mizo tawng pai deuh mai hian, “Lo chhuak rawh u” a rawn ti a, ka nu chu a rawn kal a, “Ti ru, i va chhuak ang u” a ti a, min rawn kai chhuak a. A kut chu a thlan dup a, a khur nasa hle tih ka hre bawk a.

Ka nu chuan Ringa nen chuan min kai chhuak a, naute te chu U hriati leh U Thlamuani te chuan an rawn pawm chhuak bawk a. Kan choka ah chuan ka pa chu an lo rek nawk nawk a, en a hreawm kher mai. Ka pa, ka rin em em, huaisen ber leh mi zawng zawng ngam hiala ka hriat chutia an lo sawisa han hmuh chu nuam ka ti hauh lo. Ka en tha ngam lo va, kan tukverha  sava hmul kan thiah chu ka en char char a.

Vaipa chu kan hriat thiam loh turin a tawng nawk nawk a, hrethiam lo mah ila a thinrim tih chu ka hrethiam vek tho. Ka pa chu a chhir pawp pawp a, thisen chu a luang zeih zuih tawh. Chutah keini ho chu a mal te te in min rawn melh dan dan a, ka u chu a han melh uluk deuh a, a nau pawm lai chu laksak in ka nu chu a pe a, U Thlamuani chu a lo au tuarh tuarh a. Ka nu chuan min kaihna chu thlahin naute chu a lo pawm a, dim hlek lovin ka U Hriati chu a chip samah tham in pawnah an hnuk chhuak ta a. Ka nu leh U Thlamuani chu an tap a, an um zui a, “Zah ngai hram rawh u, Khawngaih takin, zah ngai hram teh u” tiin ka nu chuan naute pawm chung chuan a um zui a, sipai pakhat chuan silaiin a lo tin a, ka nu chu a thu hnawk a, a naute pawm chu a thlauh thelh a, u Thlamuani chuan a va kuah a, an tap a.

Ka u chu nasa takin a tanga, a tap a, “Ka nu, ka pa, min chhan rawh u, ka duh lo” a ti a, chhan ngaihna a awm si lo. Kan thlir thap ringawt a. Kan thenawm khawvengte lah chu tumah in dik dak pawh an rawn ti hek lo. Ka mangang chuan ka u chu ka va um zui a, “Mate, lo kal suh, va haw rawh” tap chungin a lo ti a. “Ka duh lo. Ka u kha thlah rawh u, vai misual ho” tiin ka va au a, engah mah an ngai lo. Kan thenawmte in lamah ka tlan a, an in chu ka va chum dawt dawt a, “Min pui rawh u, ka u an man a nia” tiin ka va au leh a, an reh thap a. “Pu Thang, khawngaihin kawngka lo hawng teh u” tiin ka va au leh ngial a, chhanna reng reng a awm lo.

Ka u chu kawng chho ah te chuan an hnuk dawr dawr a, kan in ka en a, ka nu leh U Thlamuani chu an lo tap a, Ringa lah chu kan arbawm vuan in a tap bawk a. Ka tah hi a chhuak em em a, silai neih a, vai sipai ho chu kah zawt zawt mai ka duh a ni. Ka nu  chuan tap chungin min rawn au a, “Ka duh lo, ka u ka chhan dawn” ka ti a, ka mittui chu ka hru a, “Mate, i chhan thei dawn chuang lo, lo haw phawt rawh” a ti a, tap chungin kan in chu ka pan a. “Aw Lalpa, khawnge i awm? Ka fanu kha venghim lul teh, aw Lalpa, min hmangaihtu, ka fanu, ka fanu kha, venghim rawh” a ti a, a tap hawm hawm a.

Chumi zan chu kan buai kher mai. Ka pa hliam chu ka nu leh U Thlamuani chuan an bawisawm a, keiin naupang ho chu ka lo mut pui a, an ni chu an la nau deuh a, an muhil mai a. Mutthilh ka han tum a, ka muhil thei reng reng lo. Ka u chu an that ngei dawn in ka hria a, ka pa lah chu a thih loh reng ka ring tawh lo. Ka u mama chu an that lo phawt mai a, vai sipai pakhat a that leh hram a, ka u chuan a thiante rawn pun se, ka u chu va chhanchhuak se tiin duhthu ka sam a.

A tukah chuan tuilo zetin chaw kan ei a, kan chaw ei lai chuan vai sipai pahnih an lo kal a, ka pa chu an rawn ko a, “I fanu rawn hruai rawh” an rawn ti a. Kan chaw eikham hnu daih ah chuan ka pa leh ka u chu an rawn haw a, ka u in chhungah a rawn lut chu a rawn tap lut a, a ke ah te chuan thisen a kai a, kal pawh a kal tha hleithei lo. Ka nu rilruna hmel chu ka hrethiam a, ka pa lah chu vung lek lukin kan tapchhak ah chuan a thu a, mangang tih hriat tak mai hian a lu chu a tuai leh thin a, ka pu a thih laia a hmel awm dan ang chiah kha a ni.

Zanah chuan kan mu hma khawp a, ka nu leh ka pa erawh chu vawkchaw chhumin an la meng a, an phun ri sar sar a.

“Duhthlan tur ka nei lo. Awm dan tur ka va han hrethiam lo tak em.” Ka pa chuan a ti a.

“I tih mai loh chuan engtin nge kan awm ang? Mami reng ka lainat”

“Thil dik a ni si hleinem”.

“Thil dik leh diklo a awm tawh loh hi, kan hun tawn in a zir tlat lo a lawm”

“Mahse, kan thenawm khawveng, kan mizo puite pawh an zahawm a lawm”

“Engah nge i zah ni? Nizanah pawh a tu a mah in tik pawh an rawn tih loh kha” tiin ka nu a rawl a ring lek lek a.

“Nih chu a ni tho mai, mahse ka fate, nangnite thleng thleng in intuar thei a sin”

“Kan tuar daih tawh a lawm. Hei bak baka tawrhna a awm chuang lo”

“Ti ta pauh ang hmiang.”

“Ni e, ti ngei ngei rawh. Kan fanu pawh an khawih leh duh mai ang” tiin ka nu chuan a vawk chaw chum chu a suan a.

Ka pa chu a inngaihtuah muk hmel em em a, a hmelah chuan thinrimna, lungngaihna hmu in ka inhria.

A tukah chuan tlangau a rawn au a. “Vawinni hian, sikul mualah, mi zawng zawng kalkhawm vek tur a ni” a rawn ti a. Ka nu chu kan tel ve leh tel ve loh ka han zawt a, kan tel thu chu a sawi a, ka peih lo em em a, ka hlau bawk a, mahse ka nu chuan min kai a, kan chho ta hnak hnak a.

Mual kan thlen chuan mi an lo awm teuh tawh a. Mual zawlah chuan kan thu a, ni lah chu a sa em em a, ka zun a chhuak bawk si, ka nu chu zun ka’n dil a, a phal lo bur a, Ringa phei chuan a cheh nghe nghe a, U Thlamuani chuan a’n beng dawm dawm a, Ringa chu a tap a, “Tap hlek suh, vai sipai in an man mai tur che a nia” a tih tak hnu chuan tah insum tak chung chuan a tap bang ve ta a.

Ka hawi kual a, ka pa chu ka zawng a, ka hmu reng reng lo mai. Ding meuh in ka han zawng a, ka hmu chuang lo. “Ding ding suh, thu rawh” tiin ka nu chuan min rawn hau a, “A pa ka zawng a lawm” ka lo ti thuai a, “Saw tah sawn a awm, thu vat rawh” tiin ka nu chuan min pawt thu a. Ni a sat em avang chuan a lum tawh khawp a, ka nu puanbih chuan ka chalte chu ka han hru a, lum ka tih ber tum a ni hial ang.

Rei deuh tak hnuah chuan Vai sipai ho chu an lo kal a. Min din hual a, an silai chuan min tin thup bawk si a, min kap ngei dawn a nih hi ka ti rilru a, ka nu puan chu ka vuan tlat a. Ringa chuan min rawn kai bawk a, U Thlamuani chu a mittui a tla a, ka u phei chu a hawichhuak ngam lo hrim hrim.

Vaipa chu an tawngin a tawng zuah zuah a, tawnglettu pakhat, ka hmuh ngai miah loh hian a tawng chu a lo let a.

“Nangni khua hian MNF inpui thin a. Chu chu India Sawrkar dan kalh tlat a ni. Heng hel pawl ho nen hian thuhmun reng in ni a, hremna pawh in tuar ngei tur a ni” a ti lauh lauh mai a. Mipui chuan sawi tur reng kan nei lo, nei pawh ni ila, sawi ngamna chi a ni lo.

Vaipa chuan a kut chu a hui zauh a, sipai ho chuan mipakhat hi an rawn hruai a, a lu chu an tuam tlat a, a mit zawn erawh chu an ti kaw re re a, an rawn kai dawt dawt a.

“MNF pui thin leh MNF lam tang ho kawk rawh” tiin tawng lettu chuan  vai sipai lal tawng chu a han let a.

Chupa chu a hawi kual a, a kawk tan ta a. A kawh a piangte chu sipai ho chuan an tham chhuak nawk nawk a, an kut chu an phuar sak nghal nghauh nghauh a. Chu pa chu ka haw em em a, chutia mizo ve tho siin MNF lamtang a man tirta mai chu ka hua a ni. A kawk zel a, mi sawm lai a kawk tawh, chutah Pu Thanga, kan thenawmpa chu a kawk tel ve a.

Pu Thanga a kawk chu ka lo lawm rilru viau a, a chhan chu min pui duhlo tu kha a ni a, ka nu chu ka be ru sar sar a, “Ka pa a kawk ve ang em?” ka ti a, ka nu chuan, “Kawk ve lovang” a ti ta a, ka thla chu a muang deuh huai a. Mahse kawktupa chu ka han enchiang a, ka pa ni tlat in ka hria a, ka nu chu ka be ru leh sar sar a, “A pa a va ang em em!” ka ti a, ka nu chuan min sik hlawk a, “Shhh” a ti a, kei lah chuan hrethiam hek lo, “A na” ka ti  tuarh a, Sipai ho chuan min rawn en nghal thup a, hlau tak chungin ka kimki nghal chawih chawih a.

Ka pa chuan mi sawm panga lai a kawk chhuak tawh a, chutih lai chuan ka rilruah thil dang daih  alo lut a. Hetianga kan buai nuaih nuaih hma kha chuan sikul hmunte chu a nuam thei em em a. Sikul huante chu sikul naupang, sikul kal tawhte chuan kal phal ve lo mahse kan kal ru ve a, theihaite pawh zanah kan lo ru ve hram hram a, a tla tal kan char thin a nih kha. Theihai kung chu ka va en a, a par vei tiarh bawk si a, a rah leh ang a, vai ho in an ei zo vek dawn si a, ka ti rilru a, ka ui em em a.

Ka u, Thuama kha sikul a kal tawh a, thiam deuh mai hian A AW B te a chhiar a, number te chu a sawi vei zat zat thin a, ka chak ve em em a, sikul kal hlan mawlh mai chu ka chak ve a ni. Mahse ka u Thuama chu a a damlo vak a, Aizawl ah kal pui an tum a, mahse vai sipai an lo tam tak em avang khan an kal thei ta lo a, a thih phah a. Kha mi vang pawh kha a ni mai thei, U Mama kha sipaiah a tan ve tak daih ni. U Thuama lehkhabu hluite chu ka nei ang a, sikul ka kal ve anga, u Thuama khan A B C a thiam hman lo va, ka zir anga, ka thiam vek anga, u Thuama vanrama ka hmuh hunah ka zirtir ve leh anga, tiin duhthu ka sam ve thin a. Mahse, tunah chuan sikul kal a hun daih tawh a, ka pan pawn sikula ka ah tur bag min pe tawh a, mahse, sikulah chuan vai sipai ho chu an awm tlat si a, sikul kal hun mawlh chu ka nghakhlel a ni.

Chutia ka inngaihtuah neuh neuh lai chuan thil che hrut ka hmu a, ka rilru chu a la peng nghal vek. Hnim buk karah chuan mihring ka hmu a, a che leh hrut a, a silai hmawr chu a rawn lawr chhuak a. Ka hlau chuan ka nu chu ka vuan a, chutah silai chu a ri nghal thuai a, vai sipai lal chu a tlu nghal tawp a. Mipui chu kan phu nghal sup sup in  hnung lamah chuan kan tlanchhe nghal a. Mahse kan hma lamah chuan MNF ho chu an lo lang thut a, ka nu chu a phu nasa kher mai. “Bawk rawh u” an rawn ti fiak thak a, kan bawk nghal rawk rawk a, silai chu a puak ta thuai thuai a,vai sipai ho chu an tlu nghal phawk phawk a. MNF ho chuan an tam hneh tak em avang chuan sipai ho chu sikul phen lamah chuan an tlanchhe ta a.

“Nu, a pa kha khawnge a awm?” tiin ka nu khur hlawk hlawk chunga bawk chu ka han zawt a, ka nu chu a tho a, ka pa chu sikul tualah chuan a lo let ve reng a. Ka nu chu a tlan phei vat a, ka umzui a. Ringa pawh chuan hnung deuhah min rawn zui a.

Ka pa chu a dar atang thisen a rawn chhuak a, a lu tuamna chu ka nu chuan phelh a han tum a, “Phelh suh, tlanchhe rawh u, mipuiin keimah tih an hriat chuan intan pawh a him lo ang, tlan rawh u” a ti a, a dar chu thei leh theilo in a hup tawk tawk a. Ka nu chuan kal hreh tak chungin  min kai a, ka pa chu kan tlansanta a. Mahse, ka ngai ngam thlawt lo. Ka nu kut chu ka vai thla a, ka pa bulah chuan ka tlan phei leh ta a, ka pa chuan, “Liansang, lo kal suh, let vat rawh” rawn ti nghal tuarh a. Ka hmingpuma min koh tawh chuan a thinrim hle tihna a ni. Mangang tak chungin ka nu bulah chuan ka tlan leh ta nghal a.

Mipui zawng zawng chu kan tlandarh nuaih nuaih a, ka nu bul ka thlen leh pawh chuan mi thi ka hmu nual a, kan kawmchhak naupang Thangtawia pawh a lo let ngat a.

Ka nu chuan sikul hung pawn atang chuan min ko vak vak a, chutah MNF ho chu an rawn tlanchhuak thut a, rem leh remlo chuan ka lehhawi tawk tawk a, ka pa chu dimlo em em hian an pawt tho a, sikul huan lamah chuan an kalpui ta a.

Ka nu bul ka va thleng chu ka nu chu a lo tap a, “Mate, i pa kha MNF ho in an man a, an kaphlum ngei ang. Um zui vat la, i u Mama i zawng anga, i hrilh dawn nia” a ti a, mahse ka hreh kher mai. Ka pa mantu MNF ho um zui chu ka hreh a ni. Bakah an awmna pawh ka hre silo, ka u pawh chu ka zu hmu kher dawn em ni tiin ka inngaihtuah a. “I u Mama i hrilh chuan an kaphlum lovang. Hmanhmawh tak in tlan rawh” a ti a, beidawng rilru em em chung si chuan ka tlan leh ta nghal a. Ka pa chu ka khawihngaih bawk si, ka pa a awm loh chuan awmdan tur reng ka hrethiam lo. Ringa chuan tawite chu min rawn um ve a, “Lo kal ve suh” ka ti tuarh tuarh a, a ding a, a tap a, a let leh ta a. Chu chu Ringa leh ka nu ka hmuh tawpna ber chu a ni.

MNF ho tlanthlakna hmunah chuan ka tawlh thla ve a. Hnimte chu a lo pik em em a, mahse an tawn en saah chuan ka tlan thla ve zel a, reiloteah sikul thlang kawrte chu ka pawh ta a. Chho zawng in nge, chhuk zawngin nge an kal chu ka hrethiam ta hauh lo. Let leh mai chu ka duh a, mahse ka pa chu ka chhanchhuah ngei a ngai a ni tiin kawrte chu ka zawhthla ve ta ngawt a.

Reilo teah chuan lungpui chunga mihring ke hniak la tharlam tak, la huh deuh hi ka hmu ta a, ka zawh thla ta char char a. Ka tuiin a hal chuan kawrte tui chu ka innghal mai a, chu kawrte chu kan zawh kan zawh ve tawh a, mahse tuna ka kal chen chen chu ka la zawh ngai lo hrim hrim.

Rei tak ka kal hnu chuan kawrte sirah chuan kawng a lo awm a. Ka hmuh tawh hnu ni tlat in ka hria  a. A ni tak e, nikuma kan lo kawng kha a ni, kalna tur dang hre chuang hek lo i, chu kawngah chuan ka kal ta ngat ngat a. Ka kal zel a, khua chu a rawn tlai zel a, let lehna tur kawng lah chu ka bo ti tih tawh a, kawng pengah ka kal nasa tawh si a, let leh ila, ka bo mai mai dawn a, chumi ai chuan ka u hmuh ngei ngei chu a ngai tawh a ni.

Ka hah lutuk chu ka chawl a, mahse thim hmaa eng emaw tak ka hmuh a ngai a ni. Eng nge ka hmuh tur pawh chu ka hre chuang lo, riahna tur emaw, eitur emaw tak chu ka hmuh a ngai. Chawlh pawh chawl rei ngam lovin ka kal zel a.

Tlang pawng lek lek hi ka thleng a, a thlang chu kham vek a ni a, a piahah chuan lui a luang a, lui piah lawkah chuan mihring kal chho ka hmu ta a, a tu a te pawh chu nise, an puihna chu ka mamawh a ni, tiin ka um ta ngat ngat a.

A tlanin ka tlan a ni ber tawh. Lui chu ka zuk thleng a. Ka rin ai daih in a lo lian lehnghal a. Tlema a kuang tet deuhna lai chu ka zawng a, muanchan chi ni hek lo le, ka zuang thla nghal bawrh a. Ka pa in tui hleuh min ziritir tawh bawk a, harsa lo takin ka hleuh phei a. Mahse khawilai ber kha nge an kalna ka hre tawh si lo. Ka tlan a, kawng awm thei ang chu ka zawng a, kawng mumal niloah hian mihring kalna awm tak ka hmu a, ka kal ve ta a.

Ni chu a tla ruai ruai tawh a, thimah chuan kal ngaihna ka hre dawn si lo, hmanhmawh takin ka kal chho ta hlawk hlawk a. Nidang chu nise ka chau der tawh ang. Mahse ka hah viau na a, mangang taka kal ka nih vang a ni ang, ka la chak tha a, eitur chhete nei phei ila chu duhthusam a ni.

Kawng awmang deuhah chuan ka kal zel a, chho ulh lutuk chu a lo zawl tan a, ka chawl a, khua chu a lo thim ta a.

Hnai tak takah chuan Sakhi huk ri ka hria a, ka hlau khawp a. Ka riltam lutuk chu hnahthel ro hui khawmin ka mu ta rigawt a. Thawm eng emaw hian min ti harh zawk a, ka awmna hmun chu ka hai lek lek a, mahse ka han hawi chhuak a, hla vak loa mei eng chu ka hmu a. Ka pan ta ngawt a.

Mei chu an lo tuah a, a eng em em lo na a, meiah chuan sa hi an lo hem a, ka riltam lutuk chu ka pum a ri nghal ruk ruk a, ka hnaih hret hret a, Theitat kung lian zetah hian ka pa chu an lo phuar hlawm a, a lu chu an la tuam a. MNF ho an ni tih chu ka hre thei nghal a,

Ka piah deuh atang chuan MNF dang ho chu an rawn chhuak a, an han inhmu khawm chu an inchai sap sap a. mahse ka pawh ngam nghal bik lo. Chutah an zinga pate reuhte chu a rawn ding a, a bula MNF sipaite chuan an en deuh thap a.

“Hei, vawinah kawktu kan man a, kan dahthat mai a ngai dawn a ni” a ti a, ka pa a ka an hnawh ngei a ni ang, tawng tum tak hian thawm a rawn nei a. MNF lo thleng thar ho chu an haw haw a, an silaite chu beng ri rap rap hlawm a.

Ka hlau thawng lutuk chu muangchangin ka pen chhuak a, chutah lo thleng thar a mi pakhat a rawn pen chhuak a, a silai chuan a han tin vang vang a, a kap ngei dawn tih ka hria a, au tuarh tuarh pahin ka tlanchhuak a. “Kap suh, khawngaih takin kap suh” ka ti a, an lo hawi deuh thap a, silaia tintu lah chu tudang ni lovin ka U ngei chu a ni a. “Ka u, kap suh, ka u, kap suh”.

 Silai chu a ringhal dur a, “A pa a nih kha” ka ti chuai raih a, leiah chuan ka thu hnawk a, ka tap ta a. Ka u hmel chu mak tihna in a khat a, min rawn en a, ka pa ruang chu a en leh a, ani pawh chu a mittui a tla nghal zawih zawih a. Ka u chu a tho a, ka pa ruang chu a va pan a, a hmai tuamna chu a han hlip a, lungchhe tak in ani pawh chu leiah a thu zawi hnawk a, a tap ta a.

“Misual, misual ho” tiin thei leh thei lo in ka tho a, MNF ho lak ata chu ka tlanchhia a, tah insum tak chungin ka tlan zel a.

Chung lamah chuan thla chu a eng pup a, ramsate pawh an muhil ta a ni ang, ramhnuai chu a reh duk a, hnathel ro ka rah rik rap rap bak chu ridang hriat tur a awm lo. Ka chau lutuk chu thingbul nghengin ka mu a, ka chau ngang a ni ang, tui takin ka muhil ta thuai a.

Sava hram hian min rawn tiharh a, ka han meng a, khua chu a lo eng uarh tawh a. Ka pa a thi tih chu ka rilruah a rawn lang leh hmasa ber a, ka mittui chu ka biangah a rawn luang ngiai ngiai a. Ka awmna ram chu ka hre tawh lo va, ram palailengah chuan ka vak ka vak ta ringawt a. Ka ril tam em avang chuan hnah nem deuhte chu ka ei a, tui tilo taka ka ei lai chuan ka chhaka theipui rah, hmin sen tuarh mai chu ka han hmu a, hmanhmawh takin ka pan nghal rawk rawk a, puar takin ka ei a, ka ei theih bak chu ka lo a, ka kawrah chuan ka fun a, ka kal leh ta zel a.

Chawhnu lamah chuan lui ka thleng hlawl a, lui bulah chuan leilet a lo awm a. Leilet a awm chuan thlam pawh a awm ngei ang ti rilru in thlam chu ka zawng a, thlam pakhat ka hmu a, mihring an awm ngei tih hriatnan mei a lo khu chhuak hlat hlat a.

Ka va thlen chuan putar pakhat hian eirawng a lo bawl a, min hmu chu a phu nasa kher mai. “Valte, lo lut rawh” a lo ti thuai a, makti tak leh khawngaih hmel em em hian min en a, ka lut ta a.

Kum 50 a ral leh meuh chuan Aizawlah ka awm a. In ka nei a, nupui fanau bak ah, tute pawh ka nei tawh hial a ni. Ka naupan lai khan MNF leh vai sipai ka hlauh avangin dawt ka sawi a, thudik chu tuma hnenah mah ka sawi chhuak ngai lo. Dawt ka sawi avang chuan kan khua pawh chu ka zep a, ka nu leh ka u te, Ringate, ka pa chanchin ngei pawh chu ka sawichhuak ngai reng reng lo. Mahse tun hnaiah ka pa ruang chu ka mumangah ka hmuh nasat em avangin kan khuaa zin chu ka tum rilru a. Ka nupui chuan a hrethiam chiah lo a, mahse ka tumruh em avang chuan min hrethiam a, ka fapa naupang ber chu hruaiin kan khaw lam pan chuan kan zin ta a.

Ka hriat zui danin kan khua chu khaw khawm nan an lo hmang a, tunah chuan khaw lian ve tak a ni tawh a, ka unaute, ka nute chu an la dam nge dam lo tih tal pawh hriat ka duh a ni.

Chawhnu dar hnih velah chuan kan khua chu kan lut a. A lo danglam tawh ngei mai. Hmun tin mai chu ka mitthla dan nen chuan a in anglo vek tawh a, hmelhriat reng reng kan neih bawk si loh avang chuan Tourist Lodge ah kan thleng ta ngawt a.

Kan chauh em avang chuan zanah chuan hma takah kan mu a, zing karah ka fapa nen chuan kan khaw sikul hlui chu kan tlawh a. Sikul pawh chu a lo danglam tawh em em a, theihai reng reng hmuh tur a awm tawh lo. Sikul atang chuan kan in awmna tur chu ka chhui thla a, ka fiah ta uarh uarh a.

 Kan inawmna chu kan thleng a, in tha ve deuh mai hi a lo ding a. Khawlaia naupang ho chuan min lo melh hrek hrek a.

Kawngka chu ka han kik a, nu pakhat, kan nu rual vel hian a rawn hawng a.

“Ka pi, helai velah hian Vanhlira i hria em?” ka han ti a.

“Hre hauh lo mai a, eng ang rual nge?”

Ni dawn tak, tu nge ka pa hre teh lul ang.

“Awh, Thlamuani emaw, Hriattluangi?”

“Ka va han hre lo tak em” a ti leh a.

“A nih, Ringa?”

“Vanlalringa maw?”

“Aw ni e”.

“Hria e, ka pasal a lawm, Ringa lo tho teh, hei mikhual an lo kal a nia” tiin a pasal pindan lama mu chu a ko a.

“Aw, kha kha chu khawih suh u” tiin naupang ho vaimin rawh tum chu a han hau nghal a.

Pindan atang chuan putar pakhat hi a rawn chhuak a.

“Khawi lam mi nge in nih a?, Thuami, thingpui kha han lum teh” tiin nula ve er er tawh tleirawl rawn lut chu a han tir nghal a.

Ringa hmel chu ka han en a, kei ai a tar daih tawh a, ka nau Ringa kha anglo riau in ka hria a. Mahse a mitmeng chu ka han en a, Ringa ngei chu a ni.

Ka mittui chu a rawn tla a, kan ri le lu ta mai a.

An artui lai min talh sak a, chaw kan ei a, chanchinte chu kan inhrilh a, sawi inchuh in ka tawng a, mahse ka nu te, ka u te, U Thlamuani te chuan rambuai an tuar chhuak ve lo chuan ka hlim lutuk tur pawh chu a dal a, U Thlamuani fa phirte erawh chu an la dam thu min hrilh a. Ka u Mama chanchin erawh chu a hriat tawh bik loh thu min hrilh a.

Chaw eikham chuan ka pa ruang zawn ka duh thu chu ka hrilh a, a ram vel chu ka hrilh a, Motor kawng, tha vak loin a pawh tawh thu a sawi a, kan kal ta a.

Ramhnuai chu a lo la danglam nasa lo. Ka naupan laia ram awmdan chu ka han mitthla let a, ka mithlaah ka pa an phuarna Theitat kung chu ka hmu reng bawk a. Ka pa thlarau chuan min hruai chek a ni ang, kawng pui atang chuan ka pan ding nghal char char a, ka fapa chuan min zui hlawk hlawk a, Ringa leh a tute ho pawh chu ka hnungah an lo kal bawk a.

Theitat kung chu ka hmu leh ta. A bul vel chu japan-hlo hian a lo bawhkhat vek a, Ringa chem. Chuan ka han sam fai nawk nawk a. Ka pa ruhro chu a lo la in tawn bet a.

Ka thu hnawk a, “Ka pa, min ngaidam rawh. Tunah chuan tumahin an ti na tawh lovang che. I fate hi min ngaidam rawh, kan chhanhim theilo che a, ka pa, min ngaidam lul rawh” tiin ka tap ta a.