BEISEINA ENG

BEISEINA ENG

Dt 6/3/2017

Tap hlawp hlawp thawm ka hria a, ka bengchhe ri em ni le tiin ka han ngaithla deuh vang vang a. Ka bengchhe ri chu a ni lo tawp. Sana chu ka han en a, zing dar hnih a lo ri tawh a, eng tak ni ang maw tiin ka tho chhuak a.

Kan sitting room light chu ka han on a, pawn lam a tap tih ka hrenghal a, kan parda chu kan keu de de a, kan inchungte balcony atang chuan a ni tih ka hrethiam ta a. Tu tak chu ni ang maw tiin ka inngaihtuah nauh nauh a. An pitar ber chu a ni lo tawp anga, an nu lah chu a nih ka ring chiah bawk si lo a, an nuthlawi chu a nih ka ring ta a. Nuthlawi a nia, ngaihzawngte pawh a nei dem dum anga, an inhau anga, a tap a nih chu ka ring a, ngaihthat lohna pawh nei lem lo chuan ka mutsan ta a.

Kan inchung nuthlawi chuan fanu hmeltha deuh mai hi a nei a, a hnute te pawh a um ve lek lek tawh nghe nghe. Amah phei chu ala thalai em em a, kohhranah pawh inhmang in a tangkai hle a ni awm e. Kan kohhran a in an loh avang chuan a nihna chelh te pawh chu ka hriatpui lem lo a, mahse a tangkai hle tih chu kan thiante atangin ka hre fo thin.

Chumi tuk chuan khua a vawt khawp a, ka tho peih lo lutuk chu ka han insang mar a. Hna duh in theih tawp ka chhuah a, ka peih loh thleng thlengin lehkha ka zir a, kan chungte ka tibuai a, theih tawp a ka beih avangin ka hna duh tak zirtirtu hna chu ka thawk a, mahse a va han ninawm tak em, teh hrep chuan ti rilru nang nang chung chuan ka tho a. Ka insiam nghal mawlh mawlh a, ka tlai deuh tawh avang chuan chaw pawh ei lovin ka chhuak nghal a.

Ka thlen chuan Devotion an lo nei mek a, Maths teacher Ruata chu a lo tawngtai a, an tawngtai lai chu chuh in office ah chuan ka tlan lut thuai a. Rei pawh ka awm hma chuan Ruata chu a lo lut a, min rawn nuih a. “I va tlai awm em em ve le?” a rawn ti a, “Nia, nizan ka muhil lawk thei lo a lawm le” ka ti liam mai a.

Ruata hi kei ai chuan a senior deuh a, sikula ka thawh hlima min lo ti tlangnel hmasa ber tu a ni. Kan zirtirtu pui dangte chu upa tawh tak tak hlir an nih avang in kan inzui chawt a, an inah pawh chaw ka ei ngun khawp mai. Kei aiin a sang a, kei ai upa mahse kei ai chuan a lang naupang daih a, jeans ka hak laiin a ni chu tleirawl ho duhzawngin a inchei thei tlat a, ka kamis hakte pawh min nuih nasa thin.

“Khawi maw I phone lo la teh” a rawn ti a, ka lo pe mai a, “I online ngai chuang miah lo a mi?” a ti leh a, “Ka peih thlawt lo. Ka hrethiam hleithei lo” ka lo ti a, a nui deuh vur vur a. A phone chu a rawn phawrh a, tih dan hrang hrang chu min hmuh zut zut a, a enga mah chu ka hre lem hlei lo va.

Chutia kan buai nak nak lai chuan kan English teacher chuan a rawn ko a, a phei nghal a. A phone chu ka keng a, engmah chu ka hriat ve chuang loh avang chuan ka chhuak a, a gallery chu ka en ta a. Ka enthla dan dan a, ka rin loh deuh maiin kan inchung nuthlawi thlalak chu ka hmu ta nawlh a. Biakin pulpit hmaa a ding lai hi a ni a, a langtha in a nalh reuh kher mai. “Teh daih chuan” ka ti rilru a, engmah phei chu ka ngaihtuah zui ta lem lo va.

In ka thlen chuan ala hma khawp a, darthum pawh a la ri lo. Kawngka chu a rawn inkik karh karh a, inching nuthlawi chu a rawn lut teh hlawl a.

“Hminga, e, I awm maw?” a rawn ti a.

“Awm e, enge ni ta? Teh mial che chuan” ka lo ti a.

“Enteh, khawi sikulah nge I thawh kha?”

Ka hrilh a.

“A nih chuan Ruata I hria em?” a ti ta a.

“Hria e, in inhria e law?”

“Hria a ni mai ang chu.” A ti a, a nui a, a lai deuh tih pawh ka hretiam nghal a.

Ka ngaih chu a tha chiah lo, mahse han zawh khawl chu ka hreh ve bawk si.

“Vawin a rawn kal em?” a ti a, ka chhang a, a melh ngai chu a melh deuh vang vang a.

“Lo be vat che ila tha tur” a ti ta ringawt a.

“Engvang chuan maw?” ka ti a.

“Awi, a lerh em” a ti leh a.

“Lerh pawh ka hre nang, a fel viau a lawm” ka ti leh mai a.

“Midang I ni lo bawk a, ka’n hrilh ang che thla thum zet chu kan inzui tawh a” a ti ta a. A nui deuh a, a zah hmelviau.

Mak ka ti lutuk chu ka phawk nghal hra a, ka phuchiang kher mai.

“A va mak ve” ka ti tawp a.

“Ti nge?” a ti a, a nui deuh a.

Nupui nei lai a ni tih chu ka hrilh duh angem? Ruata’n min huat phah dawn a, inchungnu Thazovi rilru a na dawn bawk si, mi inkara tlakzeh chu ka duh bawk si lo. Hrilh loh chuan Thazovi chu bumin a awm reng a, a bumtu lah chu ka thiantha ngawih ngawih a ni bawk si a,a ngaihna reng reng ka hre lo.

“A mak teh daih lutuk a” tiin ka chhang ta ngawt a, a hmel atang chuan a duhthusam chhanna a dawnglo tih chu a hriat theih tho a.

“In serious viau a mi?” ka ti leh a,

“A,  serious ve tho e. Mahse fa ka nei tawh bawk si a, ka inthlahrung ve viau thin. A la tlangval bawk sia,hna a nei bawk si nen, a luck viau ka ring a” a ti a.

Ni e, luck chu a luck a lawm. Sikul a hmeichhe naupang ho pawhin an ngaisang bik riau a, khawlai chhuahpui te hian nula melh kha a hrat viau bawk a, mahse ka lo hrethiam ngai miah lo.

March thla a lo ni a, naupang exam pawh an zo tawh a, keipawh ka awl ve ta deuh. Mahse tlai khat chu kawngka a rawn inkik dawt dawt a, Thazovi chu thinrim hmel fe hian a rawn lut a, min han hmu chu kan balcony-ah min hnuk phei a, “Ngati nge min hrilh miah loh?” tiin zawi tak si, thinrim em em hian min chhuahchhal ta a.

“Aw, engtin nge ka tih chuan ang? I bialpa kha pawmlai nei a ni ka ti tawp mai dawn em ni? Bakah I hlim hmel si a, ka khawngaih ve tho che a lawm” ka ti ta a, dawt ka sawi hauh lo.

“Mipa hi chu in mak a nih hi. Thil sual ti reng pawh hi in inzep pui a, hmeichhia hi chu kan lo va mawl tak em!” a ti a, a mittui chu a tla zawih zawih a.

Tih ngaihna vak ka hre lo. Ka en deuh tawp a, ka zei lo bawk nen.

“Engtin nge I hriatchhuah a?”

“A nupui kha chu ka hriatna a rei tawh. An chungte emaw ka ti a, a nupui lek chu lo niin. Awi, ka zak bawk si, ka thinrim ngawih ngawih. An venga ka thiannu in min hrilh a lawm. Vawinah pawh kan inhmu a, ka thinrim bawk si, ka tlawm ngawih ngawih” a ti a.

“Then hmak la nimai lawm” ka ti a.

“Chu tak chu lawm ka buaina. Ka rilru zawng zawng ka lo pe tawh si, vawinah phei chuan a nupui then a, kei min neih a duh thu pawh a sawi a sin” A ti a, a hmel chu a buai em em a.

A nupui Rinhlui chu nu hmeltha pawh a ni hran lo. A awm tawp em em a, inchhung chu vawngfai viau mahse amah chu a nu hnuk tawh a, nau a pawm nen, fel viau mahse a itawm hran loh ve em bawk a ni. Ruata chuan thiamna chin chu a nei ve tho chuan ka hria.

“A hmangaih che a, nangin I hmangaih bawk chuan a nupui chu then se, innei mai ta che u” ka han ti ngawt a, engvanga han sawi ngawt nge ka nih pawh ka hre hran lo.

“A theih loh. Chu kher kher chu ka thei lovang. Mahse ka hmangaih bawk si” a ti a, a tap a.

Thlifim lo thaw chuan a sam buai niaih te chu a rawn chhem leng deuh sang sang a, a ka a hup a, tah rik hlau tak si chuan a insut hlawp hlawp a.

“Nang in I hmangaih a, a ni’n neih che a duh tho chuan enge buaina tur awm. Thla ruk vel nghal leh ula, in inei thei mai dawn lawm” ka ti a, a eng zawng chuan thulak pui ka tum hram hram a.

“Aih, hmangaih viau mah ila, chu kher kher chu ka thei lo. A nupui fanaute chan tur a rapthlak lutuk. Ka lo tawrh tawh hnu a ni a, ka hmeichhe pui tawrh atan chuan a rapthlak ka ti em mai. Ka tuar anga, kei chuan ka tuar chhuak leh thei mai ang. Pathian in min pui leh em em ang” a ti leh a.

Hmeichhe rilru tha tak chu a ni, sawichhuak lem lo mah ila ka ngaisang ru khawp a.

Chumi tlaia ka chaw ei pawh chu a tui ngut lo. Ka thianpa chuan ka thin a ti rim em em a, len chilh a, hauh nek mai chu ka duh a ni. Mahse an nupa nun ka ti buai thei bawk si, ka rilru tha lutuk chu ka inhaw letling hial.

Kan chaw eikham chu Thazovi u mipa chu a rawn lut a, “Khawimaw, Rammawi, Ruata phone number chu min lo pe teh” a rawn ti lut nghal bawrh bawrh a, a sen vek a, a thinrim tih chu hai rual a ni lo.

Ka phone chu ka phawrh a, mahse Thazovi chu hmanhmawh em em in a ran tlan lut a.

“A ngai lo, U, a ngai lo, U Rammawi, pe suh, a tullo” a rawn ti lut nghal a.

“Kiang teh, chu pa phiangsen chu ka be reng reng duh. Thah tak a nia ka nap” a ti a, Thazovi chuan a u chu a man bet a, chutah keimah zawk chu min man bet a, ka phone chu a la a, “A tullo, in bengdai rawh, Ka mualpho nasa zawk tho tho dawn” a ti a, a u chu ngen tak te chuan a han ngen a. A u chu chek tlak tlak chungin a chhuka leh ta a.

Ka nu leh pa te chuan mak ti fe hian min lo thlir thap mai a, min va hau nasa dawn em, ti rilru nauh nauh chungin Thazovi kut atang chuan ka phone chu ka la a, “Pe miah suh aw” tiin a ni pawh chu a chho ve ta nghal a.

Chuta chin chu a reh vang vang a, Thazovi pawh chu a rawn chhuk ta miah lo va,an chingfel ta a niang ka ti a, ka rilru pawh a thawveng huai a.

Mahse Chawkhni zan ka inkhawm bang chu Thazovi u chu a lo awm a. A mangan hmel em em a, min hmu chu a thawhuai a.

“Enge ni ta?” tiin inthlak lem lo chuan a bulah chuan ka va thu thuai a.

“Thazovi bawk a ni. Ka rilru na hi a dam thei ngang lo a ni. A pasal in a sazumeidawh san pawh khan a mittui far khat pawh a tla reng reng lo. He ti taka he mihringin ka farnu neihchhun a lo ti na hi chu a tlawmthlak ka ti ngawih ngawih.” A ti a.

“A pasal in hmeichhe dang a neihsan a maw?” tiin mak ti deuhin ka zawt deuh ha a.

“Neih san e, mahse a tuar thiam fu a, pangai takin a rawn haw a, ti khian kohhranah a inhmang a, kan kohhranah phei chuan nula tangkai ber a ni chho leh thei a, mahse he tikhawpa ti kehchhe tu hi chu ka haw ngawt mai.” A ti a, ka hriatthiam pui khawp a.

“He ti em em hian a lak nat ka lo ring pha ngai miah lo a sin” ka ti a, a u thinrim lutuk chu ka hlau lek lek a.

“Nizanah te pawh zanlaiah a tho a, bathroom ah a va tap tih pawh ka hre reng. A fanu pawh a enkawl tha thei tawh lo va, hlim hmel a pu lui hram hram tih pawh ka hria, kan zingah te hian a han nui ve thin tak na a, hlim vanga nui a nilo, a thinlung hliam hliah khuh a tumna mai a ni. A tuar chhuak zo lovang tih ka hlau kher mai. He pa hi a hmangaih takzet a, mahse a rem si lo. Pathian a zah em vang a ni e” a ti ta thlawt a.

Chutah inching atang chuan an rawn ko ta vak vak a, mangang aw rawl a ni. Hmanhmawh takin kan tlanchho a, Thazovi chu a khumah chuan a lo muhil a, sawi harh an tum a, a harh thei reng reng lo. A lukham hnuai chu kan han en a, Damdawi a ei tih kan hre ta a. Hmanhmawh bak lengin kan pawm a, damdawiin lam kan pan ta nghal a.

Thazovi pa chu mangang takin a vei tawn sek a, a nu thung chu kil khatah a lo tap zawih zawih a, a u nen chuan a khum bulah chuan kan thu a. Doctor lah chu biak a hreawm em em laileng khawp a, “Naktukah a harh loh chuan beisei a awm lo a ni ang, mahse beisei bo chu a ni lo ve, theihtawp kan chhuah a nia” chu a han ti ve a, mahse kan zawt zing lutuk ning in min tawng thlamuan tih chu ka hrethiam tho.

Dar thum a rawn ri a, ani lah chu tui takin a muhil sek sek a, dar 4 a rawn ri a, engmah ala ang thei lo. Inlamah chuan an lo in singsa tan tawh a, a fanu lah chu a pi nen an inkuah a, an tap tlaivar hi a ni ringawt.

Nurse a lo kal a, beidawn nan ti niawm tak hian a rawn jection a, a kal leh nghal mai a, eng kan ang chuang lo. Kei meuh pawh ka beidawng tawh a, Ruata ka huatna chu a zual tawh kher mai.

Pawn lamah chuan sava an rawn chiar nak nak a, kawlkil chu a rawn sen deuh phut a, rawngkachak hlawm ang mai hian chum lo awmte chu ni chuan a rawn kap tle vur a. Ni lo chhuak tan tir chu ka lo thlir reng a, ni te chu tla mahse a rawn chhuak leh a, a lumna a paih lo va, a enna a hloh hek lo. Mahse keini mihringte hi chu kan va tlo lo em. Thazovi biang tai tek te pawh chu a dang bei tawh a, a hmui sen vam ham te pawh chu thisen nei lo ang mai hian a hil zo a,ka khawngaih lutuk chu ka mittui a tla hial a.

Ni chu a rawn sang tial tial a, damdawiin tukverh darthlalang chu rawn chhun tlangin Thazovi hmaiah tak chuan a rawn chhun ta a. A lu chu a rawn inthing nawk a, a awm te pawh chu a rawn insep dawrh a, en pawh ka en tha ngam lovin ka maimitchhing tlat a.

A u in “Mami, zam reng reng suh, I bulah ka awm tlat a nia” a tihri te chu ka hre thei a, mahse boruak rit lutuk avang chuan ka bengte chu a ti ngawng zo hian ka hria a. “Mami” tiin a u chuan tap chungin a nau chua ko leh a, kei pawh chu inti pachangin ka meng lui hram hram a, thei leh thei lovin Thazovi chu ni thlarah chuan a rawn nui sen sen a.