THUAMI ZUNZAM

THUAMI ZUNZAM

Inhnuaia ka zuk chhuk thlak chuan ka pu chu a lo inchei angreng khawp a. A kawrchung uk ngei mai chu ha in a sam te pawh a lo hnawih mawm zu nia. Darthlalang hmaah chuan uluk takin a lo in en vang vang a, a han in siam rem vel a, zu hmu thut ka ni bawk a, ka nuih aza ang reng khawp a.
            “Pu, khawnge I chhuah dawn?” tiin a necktie chu ka siamthat sak nawk nawk a.
            “Ka leng lawk dawn” tiin a rul tawk lekin min chhang a.
            “Khawiah?”
            “Zarkawtah”.
            “I necktie hi, a hlui tawh e, ka ta hreng rawh aw?” ka han ti a, nidang ang bawkin a duh lo luttuk tur chu a ner nang ang chu tih nak alaiin ka ta chu la turin min tir ta zawk a. Ka room lamah ka tlan chho leh vat a, ka necktie khai dul ho chu ka la a, ka perfume ka kengthla nghal bawk a.
            Ka pu chhuak tur chu nidang a ang tlat lo, nidangah chuan a lukhum a khum a, a duhtawk mai zel kha a ni a, tun tum chu a dang tlat. A necktie chu ka siam that sak leh mawlh mawlh a, a ni chu a lo ding khawng at a. Ni e, ka pu hi sipai pension ngat a ni a, sipai nundan ala vawng nasa em em a, amah pawh ala hrisel in a kum phu lovin a lang naupang reng a ni.
            Mahse kum thum kal ta a ka pi in min boral san hnu atang kha chuan a mit hnuai te a rawn chuar ve tan a, a kut te pawh a rawn zur zual a, keimahni ho bulah chuan pachang takin awm mahse a tuar a ni tih chu kan hre vek tho a, ka pi hming lam hmasa lovin a muhil ngai meuh lo.
            “Thuami, thuami, ka va ngai tak che em,,,!” tiin.
            “In thiante an thi leh tawh em ni?” tiin ka pu chu ka han zawt phawng a, uluk taka a inchei hi chuan chutiang lampang chu a ni ziah si a.
            “Thi lo ve” a ti tha leh mai a, a kalna tur chu a sawi hreh takzet a ni tih ka hrethiam ta a, zawhzui zel pawh ka duh ta bik lo.
            Ngawireng a necktie ka siam chhung chuan a lo dawh a, a sam te pawh chu uluk takin ka khuih sak a.
            Ka zawh fel hnu chuan inchung lama chhoh tumin ka inher a, ka pu chu uluk takin darthlalangah chuan ala in en reng a, stepa a ka chhoh mek lai chuan min rawn ko ta a. Ka inher vat a, ka tlanthla leh a,
“The Shangri-la awmna min lo hrilh teh!” tiin inthlahrung lek lekin min zawt a. Ka phu zawk a, chu hmun kher kher chu ka hua a ni, Mapuii nen kan inthenna Restaurant a ni a, mittui nen zak taka ka chhuah hnu hnu na kha a ni.
Ka pu chuan min lo la en reng a,
“Shangri-la maw? Zarkawt kawn ah I chhuak anga, step chhukah khan I chhuk anga,” tiin a awmna kimchang chu ka han hrilh a, a buai khawp mai. Dawr hming dang ka sawite chu a hre ve tawh si lo, “Chu mi opposite-ah” tia ka sawi te lah chu a hre ve tawh si lo.
“Ka hmu thei angem aw” tiin a mangan hmel khawp a.
“Mi I zawt mai dawn lawm” ka han ti a, a ngawi vang vang a,
“Lo kal ve zawk mai ta che” a ti ta a.
Dar sawm a ri tawh a, ka inbual leh rih a, ka pu chuan min lo tur sek a,
“Sawm pakhat hmaa kan thlen ngei ngei a ngai a nia, I muang em mai” tiin bath room kawngkhar chu a rawn chum dat dat a.
            “Sipai ho tak hi chu, hun te hi in vawng thlip thlep a, a ninawm ngawt mai” ka ti sap a, a hriat phaka sawi chi chu a ni hauh lo.
            Ka pa te an chhuah vek tawh avang chuan Taxi kan la a, kan pahnih chuan zarkawt lam pan chuan kan chuang phei ta bauh bauh a.
            Rei pawh kan tlan hman lo, traffic chu a’n jam leh ta nghal a, ka han hawichhuak a, kan chhaka dawrah chuan MAPUII STORE tih a lo la intar kulh zui a.
            Mapuii nen chuan college kan kal chhung zawngin kan inzui a ni ber. Ka hmangaih a, ani pawh chuan min hmangaih emaw ka ti thin, kan inah pawh a lo leng fo a, ka pu pawh hian a ngaina em em reng a ni. A hming ka hriat ringawt pawh hian kan tawp dan lungchhiatthlak tak kha ka hrechhuak leh thin, Chutia MAPUII STORE tih lo intar pawh chu ka hmu duh lo va, taxi glass chu ka han up a, darthlalang phenah chuan a la lang kulh tho a.
            Ka pu chuan min rawn melh a, pawna dawr hming chu a hmu bawk a, darthlalang ka up vel nen a lo hrethiam viau a ni ang,
            “Mapuii khan enge a tih tak?” a rawn ti ta chat a.
Kan inthenni bawk kha ka mitthla ah a rawn lang leh thin. “A rem thei tawh ngang lo a ni e” tih ri lah chu nimin ang maia chiangin ka la hre thei a, lungngai zeta busa ka haw thlengin. Bus-ah lah chuan pitar pakhat lakah ka inpuang chiam leh ta nghal a nih kha. Ani lah chuan thurawn min pe chiam a nih kha. “Khuanu ruat in nih tak meuh meuh chuan inthen in, kum tam pawh inhmu lo mah ula, a rem hun a lo thleng leh ngei ang. Pathian chu hmangaihnaa khat a ni a, chuvang chuan mihring leh mihring inhmangaihna diktak hi chu a zah ve a nia, huntha ala siam leh em em ang che, chu hun tha chu I tawng a nih vaih chuan I bawhpelh hauh tur a ni lo”. Ka nui suk a, thlaruk lai chu chu hun tha chu ka nghak tawh chu a nih hi!
            Ka pu chuan a zawhna ngai bawk chu min zawt leh a, ka hriat loh thu in ka chhang a, ka hre lo tak tak reng bawk a.
            “Mapuii kha chu a fel ka ti ngawt mai” tiin lehlam hawi pah chuan a’n la tizui a.
Ka ngawi reng a, tawng pawh ka tum lem lo, ka phone chu ka phawrh a, ka hmet kual vel mai mai a.
            “Nupui te I la nei ve anga, I ngaihzawng hmasa te chu I theihnghilh mai ang, mahse I hmangaih ber erawh chu I theihnghilh tawh ngai lovang, chuvang chuan hun tha I neih lai hian neih let leh tum ngei ngei rawh” a ti a, taxi driver chu a lo nui put put a.
            Ka pu tawngkam vel chu midang chungchang chu nise chu ka nui ve ngei ang. Ka hmangaih ber ka chan avang chuan min khawngaih a, thurawn min pe pawh a nimahna. Ka pu thiante hnen atanga ka hriat danin ka pu pawh hian vairama an awm laiin ngaihzawng nghet tak a lo nei ve tawh a ni awm e. Ka pu lah chu sipai lumum ve mai a ni a, ani lah chu IFS fanu ngat niin a pa lah chu mizo pa langsar a ni bawk si a, a pa lah chuan chutia ka pu leh a fanu inngaizawng chu a duh lo bur a, Mizorama ka pu a chhuti hlan in pasal a lo neih tir dim diam a, an in then hlenta a ni an ti thin. Ka pi kha chu a hnu daiha a chungte sawi rem sak a ni a, ka pi kha a felin ka pu a hmangaih bawk a, ka pu pawh hlim tak chuan a awm ve tak na a, ka piin a han  boral san leh meuh chuan hmangaih leh hmangaihtu chan hreawm zia chu a hrethiam viau tawh ngei ang.
            Chanmari kan thlen phei meuh chuan a lo tlai duai tawh a, traffic lah chu a jam nasa tulh tulh emaw tih mai tur hi a ni. Ka pu chuan a san chu a en a, a ning ngang tawh a ni ang,
            “Ke in phei tawh mai ang” a ti ta a.
Ka peih lo viau na in chutia pu zawk ten an tih miau chuan a thuawih in ka zui ve mai a, tarchak lo zawk pawhin a peih chuan nge ka peih loh bik ang ti rilru chung in ka chhuak a.
            Ka pu chu a kal chak ang reng khawp a, sipai bang tih takah a la khawng tha auh auh hle a, kei a tupa tlangval zawk pawn ka um deuh dawr dawr a ni.
            Zarkawt kan thlen chuan ka pu chu a kal muang ta khawp a, jail tang an tih hlum turin hreh zeta a thihna hmun tur pan ang deuh a ni. Reilo te ah chuan kan kalna tur restaurant chu a lang uarh tawh a, ka pu chu a ding deuh dat a, a hreh hmel khawp mai, a romol chu a phawrh a, a hmai chu a han hru thuak thuak a,
            “Lo va kal rawh, dawrah hian ka’n lut kawi lawk teh ang” a ti a, zawhna ka zawh leh hma chuan min nam deuh hlek a, dawrah chuan a lut nghal a, kei erawh chu The Shangri-la ah chuan ka lo va lut a.
            Ka rin ai chuan mi chu an lo tlem daih. Ka han hawi kual a, kan thinlung kehchhiatna dawhkan pawh chu a ngai ngai in a lo la awm a, ka bul vela mi te chu an nui deuh dar dar a, keimah chu min nuih ni ta hian ka ngai hial a.
            A pindan piah lamah chuan ka va lut a, ka pu thian te ka zawng rilru deuh a, mahse chutiang awm reng reng ka hmu lo. Ka inher a, ka dinglam a dawhkan pahnihna a thu te chuan ka mit a la ta chat a. Mapuii, Min hmachhawn zawngin a thu a, a hmaah chuan nu pakhat thu in an ti ti dun bawrh bawrh a.   Mapuii chu a nui leh ang bawk bawk a, he nu ka haw luttuk leh ka la hmangaih luttuk hi ka inhrethiam lo a ni, thla tam tak hmu tawh lo ka ni bawk a, mittla lek lovin ka en hi a ni ringawt.
 Chutah ani chuan min rawn hmu a, makti takin min rawn melh a, sawi tur reng a nei bik lo a niang rang takin a mit chu a lasawn leh thuai a. A chet dan vel avang chuan a hmaa thu chu a rawn hawi a, bus a ka hmuh, hmangaihna kawnga min zilh hrep tu pitar kha a lo ni. Chu pitar chuan min rawn nuih a, min la hria a ni ngei ang, chutah a tunu chu a melh leh a, a mit meng fiah kak maia rawn hawi leh pah chuan hrethiam tih hriat tak mai hian min nuih ta ver ver a.
“Chu hun tha chu I tawng a nih vaih chuan I bawhpelh hauh tur a ni lo” a tih ri chu ka bengah chuan a rawn ri nawn tluk tluk a.
 Mahse a nui reilo, a mit meng fiah tak chu a rawn buai zo a, mitthi tho leh hmel hmu ang mai hian a meng ta kawk kawk a, chutah a biangah chuan mittui a rawn luang ngiai ngiai a, a mittui kar atang chuan a nui ta hawk hawk a. Mak ti tak chuan ka han hawi chhuak a, ka pu chu tah insum tak chung si hian chu pitar, mittui nen a lo ding chu a va pan ta a.

Comments

Post a Comment

Popular posts from this blog

THENAWM NUTHLAWI

Kan in thar chu kan luah lut chauh a, ka pi dam lo nen, kan buai em em mai a. Mahse ka pi ber chuan “In thar aṭang  lo chuan kal ka tum lo, kal mah ila thlamuang pawhin ka kal chuang lovang” a ti vel bawk si nen, Hmanhmawh deuh takin kan luah phei chuk chuk chu a ni a. Kan veng chu Aizawl hmar lam, khawpui hulum takin a chim loh tak a ni a, ṭhenawm tur pawh in li nga emaw lek chauh an awm a, a reh in ka pi pawh chu a ṭha  leh sawt sawt emaw tih tur a ni a. Ka pa phei chu a lawm em em a, amah hringtu pawh ni lo mahse fa ang taka en tlattu a nih avang leh nuhrawn a ni tih pawh lang miah lova a enkawl avang chuan ka pa pawh chuan a hmangaih hle hian ka hria a, a office bang te hi ka pi a pan hmasa ber ziah a, ka pi duh chitin reng chu kan leisak emaw tih mai tur hi a ni. Kan naupan lai phei chuan ka pi chu min awmtu ber a ni a, naupang ho phei chuan kan ngaiin rei tak chhung chu ka pi bulah ka mu nghe nghe. Chutia inthar kan han luah chu kan ṭhenawmte  tur te pawh c...
Read more

RUANG KHAWHAR.

RUANG KHAWHAR. Ka bula mu ka u chu a muhil tawh a, kan piahah chuan U mama fate ho chu a nupui U Thlamuani hovin mu bawk a. Ka muhil thei lo va, tlaiah khan ka inbual lo va, ka bal nasa mai si, ka thak sep sep a, ka muhil thei lo a ni. Ka nu pawh a muhil bik lo tih a thaw atang chuan ka hria a, a chhan chu ka pa chu Vai Sipai hoin an ko leh tlat a, engtin nge an lo tih ang tih chu ka hrethiam chiah lo na a, thil lawmawm tak a ni chuan ka hre bik hauh lo. Kan kawngka chu a rawn ri rak rak a, ka nu chu a tho nghal thuai a, kan bang awng atang chuan ka bih ve nghal thuai bawk a. Ka nu in kawngka a han hawng chiah chu ka pa chu a rawn tlu lut tawp mai a. Ka phu deuh zawk a. A hmai leh a taksate chu thisen in a khat vek a, ka nu chu a au deuh tuarh a. Ka u chu ka kheuh a, tho phang lek lek hian, “Eng nge ni?” a rawn ti a, “A pa a thi dawn niang, i tho ang” ka ti ta ringawt a. Ka u nen chuan hmanhmawh fe in kan tho chhuak a, ka u chu hmeichhia tih takah a tap chu a ni deuh nghal mai ...
Read more

KA LA TLAI LO VE

KA LA TLAI LO VE. 6/oct/2016 “Enge?” tiin ka ning lutuk chu ka han au a, ka nu chuan kawngkhar chu a rawn kik deuh karh karh a, “I office dawn lo a mi? Dar kua a ri tep tawh a nia” a rawn ti a. Ka phone chu ka han en a,  Hmanhmawh takin ka inperh tho nghal a. Ka bathroom ah chuan lutin ka intifai sawk sawk a, ka chhungten chaw an ei mek lai chuan ka va chhuak a. “Engtin nge I va kaihthawh ngam zawk a? Tuman kan ngam hleinem!” tiin ka pa chuan ka nu chu a lo bia a, ka hrelo emaw a ti a ni ang, ka hre reng si a, lawm tur nge tah tur pawh ka hrethiam lo. Dawkan chu ka va kil ve thuai a, ka nau Tlankima fanu chuan min lo melh hrek hrek a. “A ni,  Monthly fee ka la pe ve lo a nia” a rawn ti a, chaw ei pah chuan ka pek tur thu chu ka hrilh nghal a. Tlankima chu a lo nui suk a, “I ni hi chuan a duat ngawt mai che” a ti a, Remmawii chu a nui a. Kan monu Diki chu a raipuar leh luah tawh a,  a mit chu a khap zuk zuk a, melh pawh min melh lo chuan chaw ka duh leh d...
Read more